Averamientu al asturianu de La Güeria Carrocera

Menéndez Fernández, Claudia Elena

N’Averamientu al asturianu de La Güeria Carrocera faise una contribución al estudiu xeneral de la llingua asturiana pente medies de la caracterización d’una de les sos realizaciones xeolectales concretes. Tómase, como corpus de referencia, una amuesa de testos orales grabaos pola autora nos últimos años a distintos vecinos del llugar, que se trescriben dafechu acordies a dellos criterios esplícitos y que s’ufren na primer parte del trabayu, tres d’una introducción. El métodu que se sigue na presentación y analís de los datos llingüísticos, na segunda parte de la investigación, ye de corte fundamentalmente estructuralista. Afítase asina una división basada na clásica separtación según los planos del llinguax y tiénense en cuenta tres grandes estayes, como son la de la fonética y fonoloxía, la de la morfosintaxis y la del léxicu, a la que s’amiesta una última que cinca a la onomástica. L’enfoque adoptáu nel tratamientu de la información ye, pola finalidá mesma d’esti trabayu, de calter sincrónicu, anque tamién s’atiende puntualmente al aspectu diacrónicu. Constitúi, en definitiva, un estudiu qu’aspira a describir dende dientro, y baxo l’abellugu del conxuntu del sistema llingüísticu asturianu, una espresión dialectal específica de la llingua.