Leizarragaren idazlanetan barrena

Salaberri Muñoa, Patxi

Hiru argitalpenen hegalpean bildurik kaleratu zituen Joanes Leizarragak 1571n Kalbinen erlijioaren sei obra funtsezko, idazkeraren itsasoan murgiltzen doi hasia zen euskarari idazmolde erabat betegina eskainiz.
Albreteko Joana erreginaren agindupeko nafar erresumako euskaldunen artean sinesmen berria hedatzeko eta sendotzeko baliabide gisa moldatu ziren guztiak, idazlan bakoitza eduki eta pisu ideologiko desberdinekoa bazen ere eta, halaber, esparru eta irakurle mota zehatzei zuzendua.
Garai hartako obra erreformistak bidaide argi-emailetzat harturik, honako azterketa monografiko hau Beskoitzeko semearen obran sakontzetik abiatu da, lanen inguruko eztabaida nagusiei helduz eta interpretazio-ildoak mahairatuz. Azken xedea, edonola ere, idazlanen zinezko ekarpena kalibratzea izan da, eta, guztiaren gainetik, Leizarragaren ekimen erraldoiaren garrantzia egokiro baloratzea.