El cuestu camín hacia la normalidá

la normativa llingüística del Principáu: ésitos y milagros

Sánchez Vicente, Xuan Xosé

El cuestu camín hacia la normalidá. La normativa llingüística del Principáu d’Asturies: ésitos y milagros, de Xuan Xosé Sánchez Vicente, ye’l relatu, amenu y delles veces agrín, de cómo se fraguó, debatió y aprobó’l 12 de marzu del 1998 la Llei d’Usu y Promoción del Bable/Asturianu y lo que tuvieron de protagonistes el PAS (Partíu Asturianista) y el so diputáu, l’autor d’esta obra. Ye esta Llei 1/1998 «l’únicu desendolcu llegal y prácticu del artículu 4 del Estatutu d’Autonomía» –de pasu, el llibru tamién nos cuenta la nada fácil concreción d’esti artículu– y, poro, la única norma garante de la protección y promoción del asturianu (y del gallego-asturianu) y de los derechos d’usu de quien lu falen; llei, polo demás, que nunca nun tuvo llibre d’enemigos, del llau de l’«Asturies sensata y pensante» pero tamién del mundu asturianista. A cuasi trenta años de la so aprobación, la mirada que la sociedá asturiana posa sobre esta llei ye anguaño otra bien distinta: quien-y negaron el pan y el sal reclamen güei’l so desenrollu y ven nella la única posibilidá de garantizar los derechos llingüísticos d’una parte del pueblu asturianu, la que se manda d’esa llingua. Hasta qu’heba cooficialidá.