El nacimientu d'Ouetum

la toponimia como testigu de l'articulación histórica del centru d'Asturies

Viejo Fernández, Xulio

Esti llibru propónse contribuir dende la llingüística al discutiniu sobre los oríxenes históricos de la capital asturiana a partir del nome d’ella. Nesa xera, l’análisis propiamente etimolóxicu d’esti entámase atendiendo col contestu xeográficu y toponímicu non solo de la ciudá o conceyu d’Uviéu sinón del conxuntu de l’Asturies central y, más específicamente, del valle mediu del Nalón. Con ello, mírase de reconstruir el sistema toponímicu local orixinal nel que la denominación Ouetum/Ouetao algamara’l so propiu sen como denominación d’un espaciu con personalidá propia dientro del marcu territorial que va articulándose nel corazón d’Asturies ente la dómina romana y l’altomedieval. La investigación acútase en tou casu a los métodos propios del análisis filolóxicu a partir de los datos qu’apurren les fontes orales y documentales, considerando distintes claves semántiques, referenciales o d’evolución fonética a cuenta d’una serie de términos (d’aniciu prerromanu o románicu) que cuayen nel usu toponímicu del períodu tardoantiguu.