Los cuartos propios de la lliteratura asturiana

una conversación colectiva

Galán, Inaciu

I Premiu Yolanda Huergo

Si se pudiera representar la lliteratura asturiana como una casa, agarrando una de les imáxenes preferíes de la poesía del Resurdimientu, veríamos que les muyeres, en munchos momentos, vivieron albentestate, fuera de les muries o ocupando algún cuartín de los anexos. Los albañiles que construyeron l’edificiu lliterariu (los antólogos, los bibliófilos, los historiadores de la lliteratura…) hasta finales del sieglu xx nun s’ocuparon de facer habitaciones pa les muyeres; y cuando les ficieron, nun nos engañemos, ye porque yá les teníen al pie d’ellos cola espátula na mano construyendo.