Dientro del engrane

García Menéndez, Manuel

Dientro del engrane recupera como personaxe principal al inspeutor Marcos Engrueba, protagonista d’El visitante impropiu, qu’apurrió a la lliteratura escrita n’asturianu una pieza mayor, de novela grande, por dimensión y por ambición lliteraria. Dambes obres vienen a desmontar el tópicu del localismu reduccionista no cultural. L’ambiente miau onde se desenrolla bona parte d’esti relatu ye d’una maxistral puesta n’escena y va axuntando una comuña de personaxes de toa mena que traxinen per aquel Madrid finisecular y preurbanita enllenu de chupatintes, cesantes de turnu, cocineros, criaes, aguadores, serenos y mozos de cuerda, pero onde tamién había espaciu pa maquinaciones polítiques y asesinatos que facían les delicies del vulgu. Ellí campa como defensor del orde un repolitu y científicu inspeutor, Marcos Engrueba, notable émulu del celebérrimu d’Arthur Conan Doyle. La mesma bayura descriptiva y la mesma variedá de tipos humanos trescala Dientro del engrane, que vuelve a inxertase nel xéneru detectivescu pero arriquecíu cola mirada galdosiana a los tipos humanos y la concienzuda y rigurosa documentación hasta no más cotidiano y doméstico. Pero esi trabayu d’investigación y lexicográficu examás torga la llimpieza y naturalidá de la prosa nin el fluxu del discursu narrativu, que l’autor conduz con mano maestra.